Hví?

Syrgjandi

saknandi

spyrjandi

hví

Hvað veldur

hver heldur

er einhver

er eitthvað

sem stjórnar

sem ræður

hví

Nístandi

nöturleg

niðadimm

nótt

Mig lamar

mig lýjir

Þung hugraun

þín hryggð

hví

Huggandi

hughreisting

heilandi

von

Umlykjandi

umvefjandi

sefandi

styrkjandi

von

Kannski

Kannski mun ég flytja burt

eitthvert þangað sem að engu er spurt

Mögulega finn ég annan stað

einhverskonar hlutlaust millistig

þar sem ég get jafnað mig

Dregst í gegnum þennan dag

Munstra upp orku og tek enn einn slag

stari tómum augum fram á við

Leita dauðaleit að sjálfri mér

Er hún kannski ennþá hér

Má vera`að ég breyti til

Gleymi öllu um þetta tímabil

Kannski finn ég aftur tilganginn

Kemst hugsanlega í spjarirnar

jafnvel út um bakdyrnar

Textinn er undir áhrifum af laginu Hard candy christmas og sumt nett þýðing þó ekki sé hún trú enska textanum í heild eða kjarnanum þar sem gætir smá bjartsýni, kannski óskhyggju eða vissu. Ekki er heldur haldið í jólatenginguna í erlendu útgáfunni þó verði að segjast að hún er ein ástæðan fyrir að ég henti þessum línum á blað, skeitti engu um formlegheit né braghætti heldur lét bara vaða. Önnur ástæða er sú að svo skrítið sem það er þá er eins og sorg um jól sé enn átakanlegri en sorg á öðrum tímum, þ.e. fyrir þá sem utan standa. Hvað um það, ég ætlað að henda honum út í cosmóið, hugsa hlýlega til þeirra sem syrgja og og fá mér kaffi. Veri góð hvert við annað, umburðalynd og kærleikrík…

Lagið er eftir Carol Grisham Hall en enska textann eiga © Universal Music Corp., Otay Music Corp., Daniel Music Ltd. Engin skákar drottningunni Dolly Parton þegar kemur að því að flytja átakanlegan texta ekki einu sinni nær Cindy Lauper að komast með tærnar þar sem Dolly hefur hælana þegar kemur að flutningi þessa lags. P.s. íslensku útgáfunni er ekki ætlað að falla að laginu.

Í dag

Hér neðar má finna tvær útgáfur af sama texta, annar er fyrir Snúðinn minn og hinn er fyrir Rúnar Berg en báðir fyrir alla þá sem að þessum dásemdar börnum standa.

Í dag (Snúður)

Í dag, meðan sólin í skýjum sig felur
í sálinni þungi er Snúðurinn sefur
í dag vil ég gleyma og stimpla mig út
í dag mun ég kveðja sársauka og sút
í dag

Í dag vel ég daginn og gleðin er sæt
í dag lít ég til baka, ég gleðst og ég græt
Ærslin og fjörið, lífið og lætin
endalaus hamingja, gleðin og kætin
ég man

Og nú liggur hún þarna orkulaus, dofin
oftast með verki, ómótt, ósofin
Staulast um húsið, slitið hörundið marið
skelmislegt blikið í augunum farið
í dag

En þrátt fyrir allt hún er þarna ennþá
endalaust úthald og allt innanfrá
Ég fæ hana aftur ef ég held út um skeið
þá má ég gleyma því hvernig mér leið
í dag

(17. ágúst 2021 Anna Elísa)

Í dag (Rúnar Berg)

Í dag, meðan sólin í skýjum sig felur
í sálinni þungi er Rúnar Berg sefur
í dag vil ég gleyma og stimpla mig út
í dag mun ég kveðja sársauka og sút
í dag

Í dag vel ég daginn og gleðin er sæt
í dag lít ég til baka, ég gleðst og ég græt
Ærslin og fjörið, lífið og lætin
endalaus hamingja, gleðin og kætin
ég man

Og nú liggur hann þarna orkulaus, dofinn
oftast með verki, ómótt, ósofinn
Staulast um húsið, slitið hörundið marið
skelmislegt blikið í augunum farið
í dag

En þrátt fyrir allt hann er þarna ennþá
endalaust úthald og allt innanfrá
Ég fæ hann brátt aftur ef ég held út um skeið
þá má ég gleyma því hvernig mér leið
í dag

(17. ágúst 2021 Anna Elísa)

Í dag las ég færslu á facebook sem hitti mig beint í hjartastað því ég hefði svo vel getað skrifað hana sjálf og ég settist niður og skrifaði textann hér ofar. Hann er bæði um Snúðinn minn og elsku litla frænda Rúnar Berg. Bæði berjast þau hetjulega við krabbameinið hvítblæði og það er meira en tvöfalt sárt að fylgjast með þeim og fólkinu þeirra sem er fólkið mitt líka, og það er óneitanlega oft óbærilega sárt að horfa upp á sársauka, vanlíðan og endalaus pikk og pot á spítalanum, aðgerðir, svæfingar og aukaverkanirnar sem fylgja.

Færsluna á facebook sem ég vísa til skrifaði Hulda mamma Rúnars Bergs og við erum sammála um það hve mikilvægt það er að njóta barnanna sinna, njóta þess sem þau eru, þess sem einkennir þau og gerir þau þau. Einn dagur getur tekið það allt burt og skilið eftir skel, annað barn, öðruvísi en eins og Snúður segir, hún er enn hún og hún verður aldrei krabbameinið

Sjá: https://skrinid.wordpress.com/2021/07/10/eg-er-enntha-eg/

Það er samt auðvelt að gleyma því í öllu atinu og stundum er sorgin yfir því sem einu sinni var, óbærileg og sorgin vegna þess sem þau einu sinni gátu, því sem virtist svo sjálfsagt og ég held að stundum þurfum við sem að börnunum stöndum að leyfa okkur daga til að syrgja það sem var og átti að verða, leyfa okkur daga til að muna, til að gleðjast og ekki síst leyfa okkur daga til að líta fram á veginn og hlakka til þegar þau hressast þó þau verði ekki sömu börnin því reynsla af þessu tagi þroskar þau alltof fljótt og hefur óafmáanleg áhrif. Án efa verða þau bæði eitthvað frábært og dásamlegt og það er ekkert að fúlsa við.

Samt langar mig oft til að öskra og gráta, kvarta og kveina og ég ætla að leyfa mér það í takmörkuðu magni, í einrúmi því lífið er hrikalega ósanngjarnt og vont stundum. Mér þykir líka alltaf erfitt að vita hverju er best að svara þegar fólk spyr hvernig gengur því þó meðferðin gangi samkvæmt áætlun og Snúður svari lyfjunum vel þá er þetta allt annað en létt ganga, erfiðar lyfjagjafir, ótal svæfingar, eftirköst og endalausar pillur sem þarf að koma í litla kroppa sem eru svo oft hræðilega slappir. En ég ætla samt að leyfa mér að gleðjast og vera ánægð með það sem vel gengur, njóta góðu daganna, stundanna og augnablikanna og muna að þetta tekur enda. Hér er að lokum lítil saga af Snúðnum, nýkomnum af spitalanum. Amman spurði hana hvernig gekk og Snúður hnykklaði vöðvana, hallaði undir flatt og sagði “ Ég er hörkunagli!” ….eftir smá þögn og með skelmissvip bætti hún við …”en með lausa skrúfu, og svo hló hún innilega.”

Síðasta hálfa árið hefur verið mikil reynsla og þung en um leið hef ég upplifað óendanlega mikla góðvild og manngæsku og ég er orðlaus yfir góðsemi og kærleika fólks, jafnvel ókunnugra, orðlaus. Þúsund þúsund þakkir.

Líflegi, orkumikli, aldrei kyrr, hressi, dásamlegi Snúðurinn minn:

Titill ljóðsins er sóttur í söng eftir John Denver sem heitir Today en að öðru leyti ekki þýðing á þeim texta þó áhrifin séu sterk enda hefur Denver verið í miklu uppáhaldi allt mitt líf…

Ég er ennþá ég

Þegar ég sé
snúru í sambandi
afgreiðslu gangandi
í tölvunni
þá langar mig bara
að tosa í hana
það er ég

Ég er ekki krabbamein
Ég er ennþá ég
Snúður afa og ömmu
Einstaka mía mús
tatus og mömmu
Ég er bara ég

Hreyfing í blóðinu
iða í skinninu
eftir tónlist í minninu
svo glöð
verð bara að hreyfa mig
grínast og kæta þig
það er ég


Ég er ekki krabbamein
Ég er ennþá ég
Snúður afa og ömmu
Einstaka mía mús
tatus og mömmu
Ég er bara ég

Stundum vil ég
horfa í símanum
hangsa í ipadnum
vera ein
þögul og hæglát
hugsi og hljóðlát
það er ég

Ég er ekki krabbamein
Ég er ennþá ég
Snúður afa og ömmu
Einstaka mía mús
tatus og mömmu
Ég er bara ég

(AE og Snúður 10. júlí 21)

Heima er best

Heima er hjarta þitt hvar sem þú sefur
Heima, það besta sem að þú hefur
Heima er fólkið sem hjálpar, sem styður
heima er staðurinn þar sem þú biður 

Hvort sem þú gantast, hlærð eða grætur
heima þú sofnar og ferð þar á fætur
Aldrei og ekkert er jafngott og heima
Albesti staðurinn til þess að dreyma

Heima er best og þar ertu þú sjálfur
Hundraðfallt sannur, heill ekki hálfur
Þarft ekki að látast, þykjast né sýnast
Þar ertu meðtekinn, gallarnir týnast

Best allt í heiminum bíður þín heima
hvar sem þú ferðast um heima og geima
og þegar þú tekst á við það sem er verst
óttastu ekkert því að heima er best
AE 6. júlí 2021

Heima er best

Heimili byggt úr sprekum og mold
eða heimili mótað í snjó
Heimili háreist á fegurstu fold
eða heimili grafið í mó

Heimili á fjalli, á strönd eða í dal
heimili háreist og sterkt
Heimili í afskektum fjallasal
eða heimili mikið og merkt

Ókeypis heimili, dýrt eða falt
mikilfenglegra en flest
Hvar eða hvernig er ekki allt
því að alltaf er þitt heimili best
AE 6. júlí 2021

Systur mínar og ég

Stundum vildi að ég vera eins og Adda

sem skapar listaverk í efni og rými

Stundum óska ég þess að vera lík Kötu

dugnaðaforkur sem aldrei gefst upp

Það væri stundum gott að líkjast Hemmu

Ákveðin sem hún er og fylgin sér

Ég vildi gjarnan vera meiri Gudda

snillingu í eldhúsinu og á saumavélina

Oft vildi ég líkjast Mörtu

vera áreiðanleg og hugulsöm

Það væri ekki slæmt að líkjast Láru

mannelskri og hjálpsamri

Mig langar líka að vera eins og Hrabba

hrókur alls fagnaðar í hverju teiti

Ég vildi svo gjarnan hafa í mér smá Elínu

ljúfa glaðværð og glettni

Og ekki væri amarlegt að búa yfir

hugrekki Báru og báráttuvilja

En stundum velti ég fyrir mér

hvort það er ekki best að ég sé bara ég

(24.4.2021)

Minningar

Hugsa um þá sem ég á
Hugsa um þá sem mig langar að sjá
með hugann fullan af minningum
um allt sem að hefur hent

Takk fyrir þá sem ég hef
Takk fyrir þá sem að gengu sinn veg
með hugann fullan af minningum
og hver og ein þeirra, hver og ein þeirra` um þig

Þá ég minnist þeirra daga þegar lífið lék við mig
þegar trúði ég á hamingju, stöðugleika´og frið
Núna kelur sál og hjarta er ég heyri minnst á þig
því ég sé þig ekki aftur fyrr`en kallar dauðinn mig, nei

Sumir dagar taka á
Sumir fela tár á brá, jahá
þannig dagar líða hjá
láttu þá líða hjá, já

Hugsa um þá sem ég á
Hugsa um þá sem mig langar að sjá
með hugann fullan af minningum
um allt sem að hefur hent

Takk fyrir þá sem ég hef
Takk fyrir þá sem að gengu sinn veg
Með hugann fullan af minningum
og hver og ein þeirra, hver og ein þeirra`um þig

Doo doo, doo doo doo doo
Doo doo doo doo, doo doo doo doo
Doo doo doo doo, doo doo doo
og hver og ein þeirra, hver og ein þeirra`um þig

Sú var tíðin að mér þótti allt svo yfirþyrmandi
Mér fannst sem vonska heimsins væri yfirgnæfandi, ó já
Núna lýsir innri friður myrkrið sem að var svo svart
og ég veit það lýsir fyrir þig og það lýsir skært og bjart, já

Sumir dagar taka á
Sumir fela tár á brá, jahá
þannig dagar líða hjá
láttu þá líða hjá, já

Hugsa um þá sem ég á
Hugsa um þá sem mig langar að sjá
Með hugann fullan af minningum
um allt sem að hefur hent

Takk fyrir þá sem ég hef
Takk fyrir þá sem að gengu sinn veg
Með hugann fullan af minningum
og hver og ein þeirra, hver og ein þeirra`um þig

Doo doo, doo doo doo …
og hver og ein þeirra, hver og ein þeirra`um þig

Doo doo, doo doo doo …
og hver og ein þeirra, hver og ein þeirra`um þig

lalala…
og hver og ein þeirra, hver og ein þeirra`um þig

(AE 19. febrúar 2021)

Höfundar: Adam Levine / Jacob Hindlin / Jonathan Bellion / Jordan Johnson / Michael Pollack / Stefan Johnson / Vincent Ford

Lítill engill fer til himna

Brotið ríður, brýtur allt og engu eirir
Bitur þögul neyðarópin engin heyrir
Sálin grætur er særðu hjörtun veina
Skil ekki hvað máttarvöldin meina
-Lítill glænýr engill flögraði til himna

Láttu ljós þitt loga Drottinn svo hann rati
Leyfðu þeim sem syrgja trúa að til sé bati
Láttu engla þína faðma hann og kyssa
Ljúflinginn sem við máttum engan veginn missa
-Engillinn litli sem flögraði upp til himna

Sorgin dregur kvalda sál í dýpið svarta
síðasta kveðjan nístir bæði huga og hjarta
þó lífið sé hrímkalt, þokukennt og frosið
þá englabarn í englaörmum brosir
-Elskaða barnið sem kvaddi og fór til himna

(AE 3. janúar 2021)

Hvað get ég annað en elskað þig?

Gönuhlaup
eða tímabært
En hvað get ég
annað en elskað þig

Er það rangt
eða satt og rétt
en hvað get ég
annað en elskað þig

Ritað er í stein
skrifað er í ský
brautin okkar bein
dýrmæt er ástin ný

Þú og ég
stöndum saman sterk
en hvað get ég
annað en elskað þig

Ritað er í stein
skrifað er í ský
brautin okkar bein
dýrmæt er ástin ný

Vertu minn
taktu líf mitt allt
en hvað get ég
annað en elskað þig

Frjálsleg þýðing, Anna Elísa 27. sept. 2020 fyrir Júlönu mína á textanum Cant help falling in love with you eftir George David Weiss / Hugo E. Peretti / Luigi Creatore og hún flutti svo undurfallega til Steina síns þann 30.10. 2020 þegar þau gengu i hjónaband

Kannski fæ ég leyfi síðar til að setja inn smá hljóðklippu sem ég á og kannski jafnvel myndir en við sjáum bara til með það og þangað til nota ég mínar myndir frá þessum dásamlega degi… og elsku Júlíana og Steini, innilega til hamingju með hvort annað og mínar allra bestu óskir um bjarta, skemmtilega, dásamlega framtíð… ❤️❤️❤️

Útgefið efni

Undanfarið ar eða svo hef ég unnið að því að safna saman textum sem ég hef gert og setja þá á vefinn minn Koffortið á undirsíðu sem heitir Skrínið. Fyrsta uppgötvunin mín sú að mörgu hef ég glatað, m.a. skjali með á annað hundrað textum og þó sumir séu á öðrum visum stað vildi ég gjarnan finna hina, þó ekki nema sé til gamans. Hver veit, kannski dúkka einhverjir upp síðar. Næsta uppgötvun var að fleira hafði ratað í útgafu en ég mundi og suma af þeim textum á ég ekki en get þá kannski pikkað upp einhvern daginn.

Hljómsveitin Narsissa gaf út eina eða tvær plötur en þær finn ég hvergi núna

Erdna Varðardóttir, Jólanótt, hér á ég texta við gullfallegt lag

Anna Júlíana Þórolfsdóttir, Von fyrir alla og Söngur til þín. Á báðum plötunum á ég nokkra texta.

og ekki má gleyma söngleiknum sem ég samdi og var sýndur víða um land á sínum tíma. Júlíus Hraunber samdi mörg laganna, snillingurinn sá en Jón (Sveisnsson) heitinn átti þrjú lög og texta ef ég man rétt og 2-3 lög fékk ég leyfi til að nota frá einni af minni uppáhaldss í útlandinu. Verkið heitir Bók sannleikans og leikarar voru á aldrinum átta til fimmtan ára ef eg man rétt auk Júlíusar og Erdnu. Þessi snilldar krakkaskari mun alltaf eiga sérstakt rúm í hjartanu á mér eftir uppsetningu verksins, æfingabúðir og ferðalög vitt og breytt til að sýna verkið verkið. Að ég tali nú ekki um foreldrana sem treystu mér fyrir hópnum. Elías Árnason útsetti 1-2 lög og spilaði undir svo það var langt í frá að þetta væri eins manns verk

2021 Covid jól og lagið Jólanótt sungið  https://fb.watch/apcaDfz21H/